Ұлыбритания Елшісі Астанадағы JCB арнайы техника көрмесіне қатысты

2025 жылғы 12 қыркүйекте Астанада Autodom Machinery компаниясы құрылыс және тау-кен саласына арналған жаңа техниканы таныстыратын жыл сайынғы JCB Open Day шарасын өткізді.
Іс-шараға 100-ден астам клиент, серіктес және салалық өкілдер жиналды. Құрметті қонақ ретінде Қазақстандағы Ұлыбританияның Төтенше және Өкілетті Елшісі Салли Джейн Аксворти қатысып, құттықтау сөз сөйледі. Өз сөзінде ол екі ел арасындағы ұзақ мерзімді ынтымақтастықтың маңыздылығын және техниканың Қазақстан экономикасын дамытудағы рөлін атап өтті:
«JCB — бұл бүкіл әлемге белгілі атау. Бүгін осындай әсерлі JCB машиналарының арасында тұрып, біз осы амбициялардың іске асуын көреміз. Бұл жай ғана техника емес — Қазақстанның өркендеуіне үлес қосатын британдық инженерияның символдары», – деді елші.

Дипломаттың айтуынша, Қазақстанның тау-кен өнеркәсібі – ұлттық экономиканың негізгі құрамдас бөлігі, елдің ЖІӨ мен экспортына айтарлықтай үлес қосып отыр. «JCB бұл үдерісте маңызды рөл атқарады, сенімді әрі жоғары тиімді жабдықты жеткізіп, тау-кен кәсіпорындарының қауіпсіз, тиімді және тұрақты жұмыс істеуіне ықпал етеді», – деді Салли Джейн Аксворти.

Autodom Machinery компаниясының коммерциялық директоры Дмитрий Юрьев те сөз сөйлеп, техниканың сенімділігі мен практикалық құндылығына назар аударды:
«Біздің басты мақсатымыз – клиенттер машинаны ғана емес, өз жобаларына арналған нақты шешімдерді көруі. JCB – Қазақстанның кез келген жағдайында сенімді жұмыс істейтін және бизнестің тиімді әрі бәсекеге қабілетті болуына көмектесетін техника», – деді ол.

Шара барысында құрылыс және тау-кен өнеркәсібінің болашағы, технологиялық даму мәселелері және халықаралық тәжірибе талқыланды.
JCB компаниясы (Joseph Cyril Bamford Excavators Ltd.) 1945 жылы Ұлыбританияда құрылған. Бүгінде ол құрылыс, ауыл шаруашылығы және өнеркәсіпке арналған жабдықтардың әлемдегі жетекші өндірушілерінің бірі. JCB брендімен 300-ден астам түрлі үлгідегі машиналар шығарылады. Қазақстанда JCB-дің ресми дистрибьюторы — Orbis Kazakhstan құрамына кіретін Autodom Machinery компаниясы.